Tag Archives: aso

Maraming Salamat sa Serbisyo, Teddy.

Pakilala ko lang sa inyo, malamang nabanggit ko na to sa blog ng ilang beses pero baka hindi pa.

Siya si Teddy. Hindi lahat ng Teddy ay bear. Si Teddy namin ay isang dog.

Cross siya ng shitzu at japanese spitz. Baby pa siya nung dumating sa amin. Regalo ng dating jowa ng pinsan ko nung sila pa. College pa lang si pinsan nun, so mga 8 years ago? Hindi ako sigurado sa timeline.

Nung naaalagaan pa siya ng mabuti, umaakyat yun at pumapasok sa kwarto ko pag gabi. Dun siya natutulog nang nakatapat sa electric fan. Amoy aso tuloy ang kwarto ko.

Nung naghiwalay si pinsan at yung college jowa niya, at lumipat na rin ng bahay, naiwan dito sa bahay si Teddy. Wala naman akong husay sa pag-aalaga ng aso kaya naitabi si Teddy sa likod bahay. Hinahatiran siya ng tira tirang pagkain dun araw-araw. Hindi na rin siya napapaliguan. Minsan, may mga bisita siyang pusa at daga na nakikipag-agawan sa pagkain niya.

Dumating nga ang Ondoy at hindi namin nailikas si Teddy. Buti na lang, hindi siya nakatali sa lugar niya at nakagawa siya ng paraan para makaakyat sa isa sa mga hidden aparador sa lugar niya. Teddy is a survivor.

Dala ng katandaan, nabulag na yung isang mata ni Teddy. Humina na ang tahol. Nakakakilala pa naman siya pero kailangan na namin siya i-surrender dahil hindi na namin siya maaalagaan. Naglilipat na kasi kami ng bahay at maliit na yung lilipatan namin.

Nagpunta kami ng dad ko sa Vitas para i-surrender si Teddy last Monday. Pinigilan ko ang sarili ko sa pag-iyak pero hindi ako nagtagumpay. Hindi kasi ako naging fair na amo para sa kanya. Hindi ako nagpaligo, minsan lang ako magpakain, hindi ko man lang naipasyal.

Sobrang nagso-sorry ako sa kanya. Sana, naging mas mahusay akong amo.

Sa susunod, kung may susunod pa, gagalingan ko mag-alaga ng aso. Tuturuan ko siya ng tatlong tricks; bark, beg, at play dead. Paliliguan ko at ipapasyal.

Maraming salamat Teddy. Maraming salamat sa serbisyo mo. Mami-miss ka namin.

Teddy , hanggang sa muli
Matikas pa rin si Teddy kahit papalayo na siya sa amin

Update: Dumaan sa bahay nung Wednesday ang mga taga Vitas para kunin yun si Teddy. Isang trailer sila kung magkahot. Nasa isandosenang aso din yung hinahakot nila nun araw na yun. May mga malalaking aso sa trailer nila, malalakas pa yung iba. Kaso, lahat nung aso, tahimik. Walang tumatahol. Parang alam nila na dadalhin na sila sa end of life care para sa mga hayop. At least, sa huling mga buhay nila, makikilala nila si Teddy. All dogs go to heaven.

Hinarang Ako Ng Apat





*Kinukwento ko to kanina lang sa officemate ko.

Lapitin talaga ako ng disgrasya pag malapit na ang Pasko. Malas talaga.

Kailangan ko kasi umalis ng maaga sa Pansol, Laguna. Seven o’clock ng umaga ang pasok ko at ganoong oras lang din magsisigising ang mga kasama ko. Kapag inantay ko sila, siguradong late ako ng at least dalawang oras.

Sayang ang bawas sa stats at kaltas sa sweldo.

Nasa dulo ng kalsada ang resort namin. Kailangan maglakad ng halos 200 meters papunta sa main road at lakbayin yun para sa highway. May mga bus na dumadaan sa highway na diretso sa Cubao kaya 2 rides lang susumahin e nasa opisina na ako.

Madilim ang kalsada na yun. May mga videoke sa loob ng mga resort at may mga kumakanta rin naman pero hindi mo maaaninag kung sino dahil sa taas ng bakod at mangilan-ngilan na mga puno. Mas nag-focus na lang ako sa paghakbang sa bakubakong kalsada na parang nasa moon dahil sa craters. Ayokong madulas. Kakabanlaw ko lang sa pool.

At marami din akong dalang gamit.

Matapos ang ilang minuto na paglalakad, nakita ko rin ang kanto ng main road. Sa wakas! Tanggal na rin ang kaba ko. Ilang hakbang na lang ito.

Pero laking gulat ko nang may sumalubong sa akin sa bandang kanan. Apat sila. Nanlilisik ang mga mata ng isa. Yung isa naman ay malaki at makapal ang buhok. May dalawang maliliit na kasunod sila.

Nang makita ako nung may nakakatakot na pulang mata. Tumakbo siya papalapit sa akin. Inilabas niya ang matalim na bagay na nakakabit sa kanyang katawan. Kitang kita ko kung gaano katulis ang mga yun.

Wala na akong nagawa kundi ang mapahinto. Naihagis ko yung hawak ko na hotdog sandwich papunta sa kanila na siya namang kinain nung malaki mula sa sahig. Patuloy pa rin sa paglapit yun isa kasunod ang dalawa pa nilang mga kasama.

Napaupo na lang ako sa takot.

Huminto ang lider nila mga anim na hakbang mula sa akin. Lumapit naman ang dalawang alalay at inamoy amoy ako. Tinitignan nila kung meron pa akong hotdog sandwich.

Wala na, naihagis ko na.

Pinagpatuloy ko na lang ang paglalakad habang sinisigawan pa rin ako ng lider nila. Takot pa rin ako na lumilingon habang hinahabol nila ako ng tahol.

Aw-aw-aw!