Tag Archives: sanlo

P:MM – Thank You Mama Mary

Holiday nun. Dahil ata Dec.8 – Immaculate Concepcion. Naisipan namin nila super Ex, Kian, at Quicksilver na magliwaliw. Una muna, nagpunta kami lahat sa bahay namin sa SanLo.

Dun ko ata unang pinakilala si super ex sa bahay namin. Para medyo hindi halata, group date ang eksena. Kaya isang grupo kami.

Matapos namin maglunch, punta namin kami sa bahay nila Kian sa San Pedro. Commute to da max talaga, halos maga-apat na oras ata ang biyahe. Medyo malayo kaya medyo madilim na nung nakarating kami dun. Ang purpose ng pagpunta, hindi ko rin alam. Basta nagpunta kami.

Ang naiisip ko lang na dahilan, gusto rin ni Kian ipakilala si Quicksilver sa kanila. Pero para hindi rin halata; group date. Ewan. Ganun ata talaga pag mga High School pa lang kayo.

Ending namin e inihatid kami ng ate ni Kian pabalik sa BelAir. Nagkotse kami. Ang travel time na tatlong oras kanina, kalahating oras na lang ngayon. Iba na talaga pag may sarili kang sasakyan. Dun ko naisip na dapat ako matutong magmaneho talaga.

Matapos kaming ihatid pabalik ng BelAir, umuwi na rin si Kian kasama ng ate niya. Nasa bahay ako ni Quicksilver at medyo gabi na talaga. Hindi pa ako nakakatawag sa bahay namin. Ang alam sa amin, hinatid ko lang sila sa sakayan papalabas ng SanLo. Hindi na ako nakapagsabi na sasama ako sa San Pedro.

So malamang, galit ang mga magulang ko pag-uwi. Patay ako neto.

Pauwi na ako nang mapadaan ako sa Club House. Pista Opisyal at may special na mass na ginagawa nang gabing iyon. Magsisimba ako bago umuwi kahit late na. Holiday of Obligation. Ayoko magkasala.

Sakto naman at kakilala ko ang pari. Sakristan kasi ako. Dahil wala siyang alalay sa misa, tumayo na akong alalay. Disente naman ang bihis ko e.

Kinapalan ko na ang mukha ko at nakisabay sa pari. Dadaan kasi sa sakayan papuntang SanLo ang pari bago ito makauwi sa Balibago. Sakto. Meron akong naging excuse. Pag-uwi ko sa bahay, para hindi ako mapagalitan, kinuwento ko sa nanay ko ang nangyari.

Buti na lang nakipagmisa ako. Buti na lang pista opisyal. Buti na lang Dec.8 Immaculate Concepcion. Buti na lang ambait ni Mama Mary. Buti na lang talaga.

Happy Birthday Mama Mary.

Sana hindi kayo malito:
Dec.8 – Immaculate Conception
Sep.8 (9months after) – Birthday ni Mama Mary

Tuwing Wednesday, magb-blog ako tungkol sa naaalala ko sa aking kabataan. Ito ang aking “Project:  Memory Miyerkules” .

Layunin nitong maisulat paunti unti ang aking talambuhay.

Abby Garra

Sa apat na magkakapatid na Garra, ikaw ang pinakamakulit. Ikaw kasi ang bunso at medyo spoiled. Medyo black sheep nga ang tingin namin sayo; pero para sa akin, isa ka pa rin kaibigan.

Kapatid ka ng kaklase ko noong elementary. Family friends din ang mga pamilya natin, pero hanggang dun lang yun. Hindi naman kita ganoon kakilala e. Pero may natatandaan ako kahit papano tungkol sayo.

Naaalala mo noon, kapag tapos na ang putukan sa New Year. Dumadalaw kami sa lugar ninyo para kainin ang tira tira sa mga Media Noche ng bawat pamilya. Andaming kwentuhan ng mga magulang natin. At tayo naman, nagtatakbuhan at naglalaro. Punung puno tayo ng energy para sa bagong taon.

Mabigat pa nga ang kamay mo minsan kapag nagkakabiruan. Yung simpleng pag kalabit sa mataya-taya natin, nagiging tulak kapag ikaw. Hindi ka rin naman ganoon kabili tumakbo at dahil pinakabata ka noon, minsan, saling pusa ka lang.

Kumusta na yung chikiting mo sa SanLo? sana ok lang siya. nung huling kita ko sa kanya, ang likot na a. sayang hindi mo pa nakita yung chikiting ng kuya ko. sure ako magiging magkasundo sila ng anak mo.

Sana pinagbigyan mo na yung kasunod. Hindi niya kasalanan ang minsang kapalpakan ng mga tao sa paligid niya. Sana binigyan mo siya ng pag-asa na mabuhay. Hindi na sa sana nahantong pa sa ganito.

Mamaya, pupuntahan ka nila mommy. Sure ako yun na ang huling pagkakataon para magkaroon pa ng konekta ang mga buhay natin.

Wag kang mag-alala, mahal ka ng pamilya mo. Sigurado ako, nalulungkot din sila sa nangyari sayo. Andyan sila Mai-mai, Ate Les, at Ate Dianne para alagaan ang mga naiwan mo.

Hanggang dito na lang. Maligayang paglalakbay sa kabilang ibayo.